Вашингтон ја повика Кина да ги искористи односите со Иран и другите земји на Блискиот Исток за да поттикне смирување и да спречи ширење на конфликтот додека Израел ги прошири своите копнени операции во Појасот Газа, јави ФТ, пренесува Инбокс7.
Соединетите Држави го покренаа прашањето со кинескиот министер за надворешни работи Ванг Ји за време на тридневната посета на Вашингтон, која вклучуваше средба со претседателот Џо Бајден во петокот. САД се загрижени за евентуална иранска воена акција за поддршка на Хамас или Хезболах што може да предизвика поширок конфликт на Блискиот Исток.
“Ние. . . ја притиснавме Кина да преземе поконструктивен пристап, а тоа секако би ги вклучило нивните ангажмани со Иранците да поттикнат смиреност“, изјави висок американски функционер по средбите со Ванг.
„Кина очигледно има односи во регионот. . . Сметаме дека треба да ги користи тие врски за да повика на смиреност од сите страни. И мислам дека некои од нивните коментари јавно се фокусираа во една одредена насока“.
Израел ја критикуваше Кина дека не зазема критички став кон Хамас поради нападот на 7 октомври. Претходно овој месец, Ванг му рече на саудискиот министер за надворешни работи, принцот Фајсал бин Фархан, дека воената кампања на Израел како одговор на нападот е „надвор од опсегот на самоодбрана“.
Во првата посета на кинескиот министер за надворешни работи на Вашингтон од 2018 година, Ванг одржа 10-часовни состаноци со Бајден, државниот секретар Антони Блинкен и советникот за национална безбедност Џејк Саливан.