11.8 C
Скопје
15 јуни, 2024
Inbox7.mk
ВЕСТИНАСЛОВНАРЕПУБЛИКА

Џафери мандатар, Митрески претседател на Собрание

Џафери вети дека врз основа на законите и Уставот, преговорите за состав на преодната Влада ќе се одвиваат соодветно на политичката потреба и состојба во државата

 

Претседателот Стево Пендаровски му го врачи мандатот на Талат Џафери, за состав на преодна Влада за спроведување на избори на пратеници. Со тоа тој стана прв премиер Албанец којшто ќе биде на чело на преодната влада 100 дена пред изборите коишто треба да се одржат на 8 мај.

Џафери вети дека врз основа на законите и Уставот, преговорите за состав на преодната Влада ќе се одвиваат соодветно на политичката потреба и состојба во државата. „Со задоволство и потполна одговорност го примам мандатот од претседателот на државата, со ветување дека совесно и врз основа на законите и Уставот, составот на Владата и преговорите за составот на Владата ќе се одвиваат соодветно на политичката потреба и состојба во државата“, рече Џафери.

Собранието доби претседател од СДСМ

Претходно Собранието ги констатираше оставките на премиерот Димитар Ковачевски и на Талат Џафери, по што со 64 гласови „за“ и 40 „против“ го избра новиот собраниски спикер, Јован Митрески, координатор на пратеничката група на СДСМ.

„Како секој пратеник, така и за мене изборот за претседател е голема чест, но пред се одговорноста е уште поголема. Во таа насока ве уверувам дека со посилен интензитет ќе продолжам да работам во интерес на функционалноста и ефикасноста на Собранието, секако во согласност со Уставот, со Деловникот, со законската регулатива, но пред се во интерес на граѓаните и државата“, рече Митрески.

ВМРО-ДПМНЕ не гласаше Јован Митрески од СДСМ да биде претседател на Собранието до одржувањето на изборите. Координаторот на опозициската партија Никола Мицевски соопшти дека Митрески не може да го поправи она што се случувало во изминатите шест години во законодавниот дом затоа што и тој, како што рече, директно или индиректно бил учесник во процесите и настаните во кои наместо интересите на граѓаните, во прв план биле личните интереси и партиските пазари.

Пратениците од Европскиот сојуз на промени не присуствуваа на седницата за избор поради бојкот.

Избор на преодна влада 

Седницата за избор на преодната Влада треба да се одржи в недела на 28 јануари.

Прв вицепремиер во техничката влада ќе биде Бојан Маричиќ, кој ќе биде задолжен за европските прашања, додека Артан Груби останува вицепремиер и министер за политички систем и односи меѓу заедниците.

Ротацијата на Груби и Маричиќ следи по одлуката за технички премиер да биде поставен кадар на ДУИ, со што министер од редовите на СДСМ доаѓа на местото на прв вицепремиер.

Измени ќе има и на раководните позиции во МВР и Министерството за труд и социјална политика, кои треба да добијат министри од редовите на опозицијата.

ВМРО-ДПМНЕ за министер за внатрешни работи го предложи Панче Тошковски, актуелен претседател на правната комисија на ВМРО-ДПМНЕ и долгогодишен адвокат. Ѓоко Велковски е нов предлог за кандидат за министер за труд и социјална политика.

Кадрите на опозицијата коишто ќе учествуваат во техничката влада денеска на дебата ги презентираа своите приоритети.Партискиот лидер, Христијан Мицкоски порача дека следните 100 дена се суштински за да има кредибилен изборен процес.

„На секој човек му е јасно дека на следните избори ќе победи ВМРО ДПМНЕ. Целта ни е да освоиме 61 пратеник за да се овозможи целосна трансформација на Македонија“, порача Мицкоски на дебатата „Важно е“. /DW

Related posts

Може ли ChatGPT да ви помогне да ја добиете вашата следна работа од соништата?

admin

Израелско-палестинската војна може дополнително да ја тестира надворешната политика на ЕУ

admin

Искрениот извештај на ЕК различно се толкува од власта и опозицијата

admin

БАЈДЕН БАРА 37 МИЛИЈАРДИ ДОЛАРИ ИТНА ПОМОШ ЗА УКРАИНА

ninja

ЕУ ќе и додели на Турција 400 милиони евра за санација на последиците од земјотресите

admin

Истражување на РСЕ: Руси поврзани со Кремљ вработени во највисокото европско безбедносно тело

admin