Премиерот Христијан Мицкоски денеска ги потпиша договорите за капитални инвестиции со претставниците на општините, кои ги исполнија условите и добија средства во рамките на проект во вредност од 250 милиони евра. Дел од средствата ќе се реализираат во овој буџет, додека остатокот ќе биде дополнет со следниот буџет за идната година.
„Денес се потпишуваат договори за 274 проекти во вкупна вредност од околу 4.1 милијарди денари, поделени во шест клучни области. Ова е наше клучно ветување до граѓаните и доказ за нашата посветена работа за инфраструктурни инвестиции и директна поддршка на илјадници граѓани,“ истакна премиерот Мицкоски.
Средствата се наменети за различни области, вклучувајќи образование, транспорт, социјална политика, спорт, култура и животна средина. Проектите опфаќаат реновирање на училишта, изградба на патишта, детски градинки, спортски центри, реставрација на културни знаменитости и системи за водоснабдување и канализација.