Американските власти во петокот објавија дека го уапсиле албанско-американецот Ералд Алимехмети во Њујорк, врз основа на обвинение за обид за поддршка на терористичката организација Исламска држава.
Ералд Алимехмети, 33-годишен, во петокот беше изведен пред федералниот судија Стјуарт Д. Арон, кој нареди негово задржување.
Официјалното лице на ФБИ во Њујорк, Џејмс Е. Денехи, по апсењето изјави дека „Ералд Алимехмети правел напори преку интернет да регрутира и обучува поединци кои тој сметал дека имаат слични ставови како неговите, и постојано споделувал упатства за изработка на експлозиви за употреба во терористички напади.“
Во соопштението за јавноста, издадено во петокот од Канцеларијата на јавниот обвинител за Јужниот округ на Њујорк, Дамиан Вилијамс изјави дека Ералд Алимехмети, со американско и албанско државјанство, живеел во Бронкс, а во 2014 година се преселил во Албанија. Тој бил двапати уапсен и затворан од албанските власти, издржувајќи затворски казни во периодите 2015-2019 и 2020-2022 година, за поседување оружје и физички напад врз други лица.
Според обвинението, во 2019 и 2020 година, тој редовно објавувал пораки и видеа на социјалните мрежи во поддршка на Исламската држава, вклучително и пораки со пофалби за одредени водечки фигури на оваа група. Во судските документи, исто така, се споменува објавувањето на видео на социјалните мрежи каде тој вели: „Исламската држава во Африка ги убива крстоносците, француските и американските специјални сили.“
Против 33-годишникот од Тирана се покренати две обвиненија: едното за обид за давање материјална поддршка на Исламската држава, за што максималната казна е 20 години затвор, и другото за дистрибуција на информации поврзани со експлозиви, разорни уреди и оружје за масовно уништување, за што максималната казна е исто така 20 години затвор.
Федералниот обвинител Дамиан Вилијамс им се заблагодари на властите во Албанија и Австралија за нивната вредна помош во истрагата на овој случај.