Преку протестите и блокадите на факултетите, студентите во Србија продолжуваат да се борат за својата иднина, правна држава и еднаквост пред законот. И покрај претстојните празници, тие изразуваат решителност дека нема да се откажат од своите барања, пренесува N1 Белград.
Мијат Караманчиќ, студент на Факултетот за организациони науки во Белград, вели дека организацијата на вчерашниот собир на Славија траела околу една недела. Поддршката ја добиле од земјоделци од самиот почеток, но со текот на времето се приклучиле и други групи – наставници, медицински работници и родители со деца.
„На Славија вчера се случи нешто фантастично што ќе го паметиме цел живот“, изјави Караманчиќ.
Мила Пајиќ, студентка на Филозофскиот факултет во Нови Сад, изјави дека патувањето до Белград било намерно попречувано.
„Додека возот сè уште се движеше, слушнав разговор од кондуктерката дека возот ќе биде намерно запрен и дека ќе се преправаме дека е расипан за да застанеме во Стара Пазова. По некое време, пристигна нов воз, но патниците веќе бараа алтернативни начини за да стигнат до протестот. Јасно е дека патиштата до Белград беа намерно блокирани како дел од репресивните мерки на еден многу уплашен режим“, рече таа.
Во Ниш, протестите се одвиваа мирно, а граѓаните покажаа зрелост, истакна Маша Поздер, студентка на Правниот факултет.
„На Тврдината испративме многу јасна порака преку транспарент – ‘Вашите раце се крвави’. Никогаш досега не сум видела толку многу луѓе собрани со една заедничка цел – борба за правда, владеење на правото и правна држава“, изјави таа.
Караманчиќ истакна дека изјавите на премиерот дека барањата се исполнети не се точни.
„Јавноста сè уште не ги видела клучните документи кои треба да покажат што се случило. Ниту едно барање на студентите не е исполнето. Ќе останеме доследни и упорни, без да попуштиме на притисоците“, изјави тој.
Поздер нагласи дека протестите на студентите не се однесуваат на претседателот, туку се насочени кон институциите кои треба да ги процесираат одговорните за смртта на 15 лица.
„Ова се протести на идните академски граѓани кои сакаат да останат во оваа земја и да се борат за нејзината иднина“, додаде таа.
И покрај празниците, студентите не покажуваат знаци на откажување. Поздер истакна дека атмосферата на Правниот факултет е солидарна, а блокадите ги сметаат за чин на зрелост и интегритет.