Демохристијаните (ЦДУ/ЦСУ) победија на парламентарните избори во Германија, освојувајќи 28,5 отсто од гласовите. Сепак, за формирање влада ќе им биде потребен коалициски партнер. Иако Христијанско-демократската унија смета дека тоа ќе бидат Социјалдемократите (СПД), кои досега беа на власт, СПД сè уште ја анализира својата иднина по тешкиот пораз.
Канцеларот Олаф Шолц (СПД) ја напушта функцијата без видливи емоции. „Чест ми е што ја имав одговорноста во овие предизвикувачки времиња”, изјави тој по објавувањето на резултатите. На прес-конференцијата во Берлин, Шолц беше придружуван од лидерите на СПД, Ларс Клингбајл и Саскија Ескен, но беше јасно дека тој повеќе не е во центарот на политичката сцена.
Мерц: Црно-црвената коалиција е можна
Лидерот на ЦДУ и најверојатен иден канцелар, Фридрих Мерц, изјави дека неговата партија веќе му испратила „меморандум за разбирање“ на Шолц, барајќи од него да не носи долгорочни одлуки без консултации. Мерц најави брзи разговори со СПД за три приоритетни теми: надворешната политика, миграцијата и економијата. „Убеден сум дека социјалдемократите се заинтересирани за зачувување на индустриските работни места во Германија”, додаде Мерц.
Демохристијаните освоија 208 пратенички места, додека СПД доби 120. Заедно би имале мнозинство со 328 од вкупно 630 пратеници во Бундестагот. „Црно-црвената коалиција е секако можна. И токму тоа го сакаме”, потенцираше Мерц.
СПД внимателна во одлуката за коалиција
Претседателот на СПД, Ларс Клингбајл, нагласи дека одлуката за коалициски преговори не е донесена. „Топката е кај Мерц – тој треба да ни пријде и да побара преговори. Потоа, членовите на СПД ќе одлучат за следните чекори”, рече Клингбајл.
СПД го постигна најлошиот изборен резултат од 1890 година – само 16,4 отсто од гласовите. Раководството на партијата разгледува опција за обновување и модернизација, што би можело да ја оддалечи од коалициските разговори.
Алтернатива за Германија (AfD) со рекорден резултат
Партијата Алтернатива за Германија (AfD) освои 20,8 отсто од гласовите – двојно повеќе од претходните избори. Копретседателката Алис Вајдел најави дека AfD ќе се обиде да ја зацврсти својата позиција во наредните години со цел да дојде на власт.
Демохристијаните и Социјалдемократите се согласни дека мора да се спречи зголемувањето на влијанието на AfD. „Овој резултат е последно предупредување за демократските партии да најдат заеднички решенија”, изјави Мерц.
Претседателот на ЦСУ, Маркус Зедер, додаде: „Тоа е последниот куршум на демократијата. Германија мора да спречи свртување кон десницата.”
СПД признава дека ги очекуваат „тешки години и тешка борба”, но нагласува дека изборните резултати претставуваат јасна порака од гласачите.