Во зимски јакни и со свирчиња околу вратот, среде студениот ветар, демонстрантите во Житораѓа држеа транспаренти со пораки како „Ќе одговарате“ и „Житораѓа е со студентите“.
Ова е вторпат жителите на ова мало место во јужна Србија да организираат протестна средба во знак на поддршка за студентите, кои повеќе од два месеца ги блокираат факултетите и протестираат низ целата земја.
„Требаше да излезат многу повеќе луѓе отколку во Белград, бидејќи тука има беда и сиромаштија, но народот е исплашен и не смее“, изјави демонстрантот Иван Стојановиќ за BBC на српски.
Тој нагласи дека не се плаши и сака јавно да ги поддржи младите за да дојде до промени, бидејќи тие се иднината на земјата.
Студентите бараат утврдување на кривична одговорност за трагедијата во Нови Сад, кога на 1 ноември падна надстрешница на неодамна реконструираната железничка станица, при што загинаа 15 лица, а две беа тешко повредени.
Владата тврди дека ги исполнила нивните барања, но студентите и нивните поддржувачи го негираат тоа.
Протестите се проширија и на други мали градови, како Грделица и Деспотовац, каде граѓаните, и покрај стравот, се охрабрија да излезат на улиците. „Неправдата и отсуството на одговорност од надлежните се главните причини што сè повеќе луѓе протестираат“, изјави еден од демонстрантите во Грделица.
Според архивата на јавни собири, од ноемвриската трагедија до денес, протестите се одржале во повеќе од 160 градови и општини низ Србија.
Протестите, кои добија поддршка од земјоделци, наставници, лекари и адвокати, доведоа до оставки на неколку министри, а подоцна и до пад на владата, откако премиерот Милош Вучевиќ поднесе оставка.
Српскиот претседател Александар Вучиќ и владејачката Српска напредна странка (СНС) сега се соочени со избор: формирање нова влада или распишување предвремени парламентарни избори. Вучиќ изјави дека одлуката ќе биде донесена до 20 март.
Опозициските партии ја отфрлаат можноста за нова влада без целосно исполнување на студентските барања. Тие инсистираат на формирање преодна влада составена од експерти, која ќе обезбеди услови за фер и демократски избори.