Со рекордна излезност од 83,5%, највисока од 1990 година, Германците гласаа на предвремените федерални избори на 23 февруари. Изборите беа распишани откако тројната коалициска влада составена од Социјалдемократите (СПД), Зелените и неолибералната Слободна демократска партија (ФДП) се распадна кон крајот на 2024 година.
Според проекциите, конзервативната Христијанско-демократска унија (ЦДУ), предводена од канцеларскиот кандидат Фридрих Мерц, заедно со нејзината сестринска партија Христијанско-социјалната унија (ЦСУ), освои најмногу гласови. Зад нив се наоѓа десничарско-популистичката Алтернатива за Германија (АфД).
Добивки и загуби на германските партии
Големиот победник на овие избори, според уделот на гласовите, е крајно десничарската АфД. Од друга страна, Социјалдемократите (СПД) под водство на канцеларот Олаф Шолц забележаа најголема загуба на гласови во споредба со претходните избори.
Бундестагот брои 630 места. Бројот на места што ќе ги освои една партија зависи од уделот на освоените гласови. За влез во парламентот, партијата мора да освои најмалку 5% од гласовите.
Можни коалициски опции
Иако ЦДУ/ЦСУ го освои најголемиот дел од гласовите, тие немаат апсолутно мнозинство. За да формираат нова влада, ќе мора да склучат коалиција со друга партија и да обезбедат најмалку 316 места во Бундестагот. Калкулаторот за коалиции прикажува кои комбинации се можни врз основа на освоениот удел на гласовите.