Опозициската СДСМ се спротивстави на иницијативата за промена на државниот грб, нарекувајќи ја непотребна и политички мотивирана. Лидерот на партијата, Венко Филипче, на прес-конференција порача дека СДСМ ќе го блокира овој процес со сите демократски средства и праша дали коалицијата ВМРО-ДПМНЕ – Влен размислува и за промена на химната.
„Грбот хералдички ги отсликува сите карактеристики на ова поднебје, јасен е континуитетот од народноослободителната и антифашистичката војна, нема етнички поделби. Доколку има таква иницијатива, најостро ќе се спротивставиме“, рече Филипче.
Како што пренесува Дојче веле, прашањето за промената на државниот грб повторно се отвора по една деценија. Премиерот Христијан Мицкоски потврди дека темата е дел од разговорите со владиниот партнер Влен.
„Ние сме една од двете постсоцијалистички држави што сè уште го имаат стариот грб, со некои мали модификации“, изјави Мицкоски.
Останува нејасно дали ВЛЕН ќе бара и двоглавиот црн орел, како симбол на Албанците, да биде дел од новиот грб на државата.
Либерално-демократската партија (ЛДП) предлага поставување на рисот како национален симбол, нагласувајќи дека тој веќе е присутен на монети, спортски дресови и други официјални обележја.
„Рисот е препознатлив за нашата земја, покажува поглед кон иднината, наместо враќање во минатото“, соопшти партијата.
ЛДП додаде дека нивниот предлог не асоцира на ниту една соседна држава, а како алтернативен симбол го спомена соколот, кој е дел од македонскиот фолклор и живее во земјата.
Последниот обид за промена на грбот беше во 2014 година, кога владата на Никола Груевски предложи грб со црвен лав на златна позадина и круна во форма на тврдина, но не успеа да обезбеди двотретинско мнозинство.