Лидерот на Алијансата за Албанците, Арбен Таравари, не негира дека инсистирал на одделни листи за локалните избори во рамки на коалицијата ВЛЕН, но тврди дека не побарал 40% од кандидатите. Тој изрази оптимизам дека ќе се постигне договор меѓу партнерите.
„Инсистирав како Алијанса за Албанците, но и другите партии да имаме одделни листи бидејќи тоа мотивира повеќе луѓе да се вклучат во изборите. Но, ќе видиме. Постои постојана комуникација и коректни односи, така што сум оптимист дека ќе најдеме заеднички јазик“, изјави Таравари.
Лидерот на Беса, Билал Касами, потврди дека Таравари не барал 40% од кандидатите, но дека се залагал за посебни листи за советници. Според него, ставот што доминира во ВЛЕН е дека коалицијата треба да настапи заедно на сите нивоа.
„Таравари не бараше процентуална распределба, тоа не беше тема. Во почетокот, барањето беше сите партии да одат со посебни листи за советници, но откако другите партии изразија согласност за заеднички настап, разговорите продолжија во насока на тоа дали Алијансата ќе биде дел од коалицијата или ќе оди самостојно“, изјави Касами.
Пратеникот на Самоопределување, дел од ВЛЕН, Беким Ќоку, нагласи дека коалицијата никогаш не била пообединета.
„ВЛЕН е една од најзрелите и најрационални политички иницијативи во албанските политички простори од почетокот на повеќепартискиот систем. Коалицијата никогаш не била посолидна и поодлучна. По изборите, ВЛЕН ќе се консолидира уште повеќе“, рече Ќоку.
Според неофицијални информации објавени од Алсат, Таравари во последниот состанок на лидерите на ВЛЕН навестил дека по 6 април би можел да го промени својот политички курс. Тој побарал разбирање од партнерите, нагласувајќи дека конечната одлука ќе ја донесе партискиот конгрес. Според истите извори, Таравари неофицијално побарал 40% од кандидатите за градоначалници.