Проширувањето на Европската унија останува еден од главните приоритети на актуелната Европска комисија, изјави комесарката за проширување Марта Кос по средбата со бугарскиот премиер Росен Жељазков во Советот на министри.
Кос ѝ се заблагодари на Бугарија за постојаната поддршка и активната улога во Југоисточна Европа, посочувајќи дека разговорите биле фокусирани на клучните предизвици со кои се соочува Унијата. Таа го повтори стратешкото значење на проширувањето, нарекувајќи го клучен политички и економски инструмент.
„Во актуелниот геополитички контекст, завршувањето на европското обединување е од суштинско значење за долгорочен мир и стабилност на континентот“, рече Кос, додавајќи дека Бугарија игра значајна улога не само во процесот на интеграција на Западен Балкан, туку и на земји како Украина, Молдавија и Исланд, за кој таа предложи повторно приклучување кон Унијата.
Кос оцени дека пристапниот процес за земјите од Западен Балкан трае предолго, но увери дека Европската комисија работи на забрзување и поедноставување на преговорите. Таа подвлече дека сегашниот политички момент е клучен, бидејќи европските лидери се сѐ посвестни за потребата од обединување на континентот во име на мирот, слободата и заедничкиот просперитет.
Комесарката изрази оптимизам дека Црна Гора и Албанија, доколку го задржат тековното темпо на реформи, би можеле да ги исполнат критериумите за членство до крајот на мандатот на сегашната Комисија. Според неа, тоа би можело да биде дополнителен поттик за останатите земји од регионот да ги засилат реформските напори.
Кос ја истакна посветеноста на ЕУ на постепена интеграција на кандидатите во единствениот пазар и заедничките политики, паралелно со пристапните преговори. Во таа насока, таа го наведе Планот за раст на Западен Балкан, кој нуди финансиски поттик за клучни реформи. Според неа, регионот нуди значителен потенцијал за развој на бизнисот, туризмот и инфраструктурата, особено ако се зајакне регионалната соработка.
Како пример, таа ги посочи „зелените коридори“ низ Западен Балкан, кои треба да го намалат времето на чекање на границите за 50 до 70 отсто, што е од корист за компании што сакаат да инвестираат поблиску до европскиот пазар.
Кандидатите, рече Кос, веќе се вклучени во клучни иницијативи на ЕУ како Стратегијата за конкурентност, Белата книга за одбрана и Стратегијата за внатрешна безбедност.
Овој процес, според неа, нема да има корист само за земјите од Западен Балкан, туку и за Бугарија – преку зголемена трговија, подобрени можности за инвестиции и подобра поврзаност со Централна Европа.
Кос заклучи дека подлабоката европска интеграција ќе придонесе за стабилност и безбедност во регионот, што е особено важно во услови на глобални предизвици. Таа повика на напуштање на историските поделби во полза на заедничка визија за иднината.