Бившиот претседател на Уставниот суд на Косово, актуелен професор по право и меѓународни односи на Универзитетот во Приштина, Енвер Хасани, изјави дека Собранието на Косово не е блокирано и може да се состане на секои 48 часа, и покрај неуспехот на пратениците да го конституираат овој законодавен орган.
Хасани ја оцени како политичка грешка одлуката на Демократската партија на Косово (ПДК), Демократскиот сојуз на Косово (ЛДК) и Алијансата за иднината на Косово (ААК) да не го изгласаат извештајот на Комисијата за верификација на мандатите. Поради тоа, конститутивната седница во вторникот беше прекината, а нејзиниот претседавач најави дека ќе се обрати до претседателката Вјоса Османи за натамошни чекори.
Партиите од опозицијата го доведуваат во прашање легитимитетот на оставката на премиерот Албин Курти и другите членови на Владата кои беа избрани за пратеници. Хасани смета дека со самото давање заклетва, тие веќе не можат да извршуваат извршни функции.
„Ова не претставува блокада, бидејќи според Деловникот, Собранието е должно да се состанува на секои 48 часа додека не се конституира. Постојат вградени механизми кои овозможуваат процесот да продолжи“, изјави Хасани.
Според него, политичката одлука да не се изгласа извештајот е парадоксална, бидејќи пратениците, избрани од граѓаните, на тој начин не го потврдиле својот легитимитет.
Во врска со оставката на Курти, Хасани вели дека истата мора да биде недвосмислена и објавена навреме.
„Ако Курти дал заклетва како пратеник, тоа автоматски го дисквалификува од извршување на функцијата премиер – дури и да нема формална оставка. Тоа го наложуваат Уставот и Законот за Влада“, вели Хасани.
Според него, дури и формално да нема оставка, со давањето заклетва престанува мандатот за извршна функција. Оние кои не се избрани за пратеници, како заменик-премиерот или замениците министри, можат да ги продолжат техничките должности до формирање на нова влада.
Хасани исто така потенцира дека претседателката Османи нема уставна улога во тековната ситуација.
„Претседателката нема никаква улога во овој процес. Решението е политички договор и изгласување на извештајот за верификација на мандатите“, изјави тој.
Политичката согласност, според него, би значела или формална оставка на премиерот и министрите, или прифаќање на фактот дека со самото давање заклетва, нивниот извршен мандат престанува.
„Во моментот кога некој дава заклетва како пратеник, тој не може повеќе да ја извршува функцијата премиер. Тоа е противуставно и апсурдно“, заклучи Хасани.