Лидерот на Демократската унија за интеграција (ДУИ), Али Ахмети, изјави дека го поддржува чекорот на претседателот на Алијансата за Албанците, Арбен Таравари, кој според него ја препознал Владата како антиалбанска. Ахмети не ја исклучи можноста за идна соработка, доколку Таравари официјално ја напушти Владата.
„Го цениме неговиот храбар чекор. Тој рано ја сфати вистината – дека оваа влада не е ништо друго освен антиалбанска,“ рече Ахмети, додавајќи дека сѐ уште не е донесена стратегија во врска со можната соработка.
ДУИ планира во текот на неделата да ги свика највисоките партиски органи, каде што, според Ахмети, ќе се разгледа ситуацијата во рамките на Европскиот фронт.
„Ако Таравари ја напушти Владата, тогаш ќе биде разгледана нова политичка состојба. Ќе ги повикаме сите членки на фронтот и ќе разговараме за понатамошните чекори,“ изјави Ахмети.
Според него, прашањата поврзани со иднината на Таравари во Владата се внатрешни за Алијансата за Албанците.
„Тоа се негови прашања. Не се ниту на ДУИ, ниту на Европскиот фронт. Тие одлуки Таравари треба сам да ги донесе и менаџира,“ додаде Ахмети.
Тој исто така се осврна и на одвојувањето на Таравари од опозициската коалиција ВЛЕН, нарекувајќи ја ВЛЕН „веќе само ЛЕН“.
Во однос на можноста за заеднички настап со Таравари на локалните избори, Ахмети рече дека сѐ уште нема конечни разговори.
„ДУИ допрва ќе ги свика раководните тела. Во следните денови ќе се разгледаат сите сценарија,“ рече тој.
Во меѓувреме, премиерот Христијан Мицкоски не откри детали за најавената средба со Таравари, но изјави дека ќе се одржи наскоро. На новинарско прашање за состојбата во владината коалиција, кратко одговори: „Одлична“.