Вицепремиерот и министер за транспорт Александар Николоски соопшти дека Владата е во преговори со нискобуџетната авиокомпанија „Виз Ер“ за воспоставување на нова линија помеѓу Будимпешта и Охрид, оценувајќи дека оваа рута има поголем туристички потенцијал во однос на Скопје.
„Сметаме дека охридското крајбрежје има што да понуди и линијата Будимпешта – Охрид ќе биде поатрактивна“, изјави Николоски во интервју за Радио Лидер, додавајќи дека се развива нов модел за привлекување авиокомпании, кој потенцијално би донел до 20 нови дестинации.
Според него, тековниот модел на субвенционирање на патници кои доаѓаат во земјата веќе дава резултати, со десет нови линии во последните месеци. Новиот систем предвидува зголемување на субвенциите, со услов авиокомпаниите да отворат најмалку десет дестинации истовремено.
„Во моментов државата субвенционира 9 евра по патник за слетување во Скопје и 12 евра за Охрид. Подготвени сме да одиме над тоа ако авиокомпаниите се обврзат на отворање на повеќе линии одеднаш“, рече Николоски.
Министерството за транспорт потврди дека се водат разговори со „Виз Ер“, чие најголемо регионално седиште е во Будимпешта. Претходната линија Будимпешта – Скопје била укината поради ниска побарувачка и завршување на субвенциите од унгарската влада.
„Охрид има далеку поголем туристички потенцијал, а Скопје веќе е поврзано со блиски дестинации како Виена и Братислава, што ја прави Будимпешта помалку атрактивна во комерцијална смисла“, додаде Николоски.
Тој исто така го потенцираше значењето на чартер летовите од турскиот „Фрибирд“, кои секојдневно носат најмалку 180 туристи во Скопје, и изрази амбиција следната година Охрид да има најмалку два чартер лета дневно.
„Ако секојдневно слетуваат по два авиони со по 200 туристи, тоа значи 800 гости дневно кои остануваат во Охрид дури и во неатрактивни месеци, полнејќи хотели, ресторани и чаршијата“, рече Николоски, додавајќи дека „Туркиш Ерлајнс“, како најголема авиокомпанија во светот, веќе лета од Истанбул кон Охрид.
Во моментов, Северна Македонија има авионски врски со 64 дестинации – 56 преку скопскиот и осум преку охридскиот аеродром, што, според Николоски, е значаен успех на Владата и концесионерот ТАВ.