Градоначалникот на општина Чаир, Висар Ганиу, изјави дека заедно со граѓаните организирал акција за собирање отпад на територијата на општината, поради, како што рече, неисполнување на обврските од страна на Градот Скопје.
Според Ганиу, отпадот што ќе се собере ќе биде транспортиран директно пред институциите на Градот Скопје како симболичен протест поради, како што тврди, запоставување на Чаир од страна на градската администрација.
„Ова е екоцид врз нашите граѓани. Ние сме оставени во ѓубре, иако сме редовни даночни обврзници“, изјави Ганиу. Тој додаде дека Чаир заслужува чиста и уредна животна средина, еднаква со другите делови на главниот град.
Градоначалникот не прецизираше дали општината формално побарала интервенција од ЈП Комунална хигиена – Скопје, но упати апел институциите на градско ниво да постапуваат еднакво кон сите општини и нивните жители.