Лидерот на Демократско движење и коалициски партнер во рамки на ВЛЕН, Изат Меџити, упати сериозни обвинувања на сметка на Арбен Таравари, откако овој денеска објави дека фракцијата на Алијансата за Албанците ја напушта Владата и преминува во опозиција.
Во својата реакција, објавена на социјалните мрежи, Меџити го обвини Таравари дека не ја донел промената што ја ветил, туку напротив, ја спречил. Според него, Таравари не се враќа кај народот, како што тврди, туку, како што пишува Меџити, „се враќа на црната листа“.
„Ти не ја донесе промената. Ти ја спречи промената.
Ти не се враќаш кај народот. Ти се враќаш кај црната листа.
Ти не ја напушташ Владата. Ти ја предаде Владата.
Ти не го претставуваш духот на членството на Алијансата за Албанците. Ти го излажа тоа членство.
Ти не си херојот на оваа приказна. Ти си разочарување – за секој Албанец, интелектуалец или неписмен, работник или стопанственик, маж или жена – ти си разочарување за секој активист и симпатизер кој гласаше и ја поддржа промената“, стои во неговата објава.
Меџити ја искористи приликата да ја потенцира посветеноста на коалицијата ВЛЕН кон ветената политичка трансформација. Тој ги повика сите членови и гласачи на Алијансата за Албанците кои се чувствуваат „излажани, предадени и оставени на половина пат“, да се приклучат на ВЛЕН, кој според него останува „политичкиот компас на промената“.
„ВЛЕН продолжува по патот на промена. Со широко отворени раце ги покануваме и ги пречекуваме сите активисти, симпатизери и гласачи кои се чувствуваат излажани, предадени и изгубени во оваа ситуација. Политичкиот компас на промената е ВЛЕН. Дојдете со нас“, повика Меџити.
Оваа изјава следува во контекст на најавата на Арбен Таравари дека неговото крило на Алијансата за Албанците ќе ја напушти Владата, посочувајќи на неисполнети ветувања и, како што рече, недоверба и сомнежи меѓу коалициските партнери.