Градоначалничката на Скопје, Данела Арсовска, најави дека од понеделник ќе започне објавување фељтон со, како што наведе, документирани случаи на спречени незаконски дејствија и криминал, за кои институциите сè уште не презеле активности.
„Во изминатите три години, спречивме повеќе од 150 обиди за нелегални легализации на дивоградби“, соопшти Арсовска преку објава на социјалните мрежи.
Таа додаде дека биле спречени и обиди за поставување асфалтни бази во населени места, како и дека биле поднесени кривични пријави против цементарницата УСЈЕ и други големи загадувачи, за кои, според неа, „другите молчат, а ние секојдневно се соочуваме со закани“.
Арсовска исто така наведе дека од Градот биле отстранети компании кои, како што рече, работеле во интерес на политички партии, и дека биле преземени мерки против корупцијата.
„За да нема место за празна реторика, ќе покажеме дека Градот постапувал веднаш, додека други продолжуваат по старо“, изјави Арсовска.