Претседателката на Северна Македонија, Гордана Сиљановска-Давкова, го предложи економистот Трајко Славески за нов гувернер на Народната банка, соопшти нејзиниот кабинет во вторникот.
Славески, кој во моментов претседава со Советот на Град Скопје како претставник на владејачката ВМРО-ДПМНЕ, е универзитетски професор на Економскиот факултет во Скопје. Тој беше министер за финансии од 2006 до 2009 година, но беше разрешен поради несогласувања со тогашниот премиер Никола Груевски околу фискалната политика.
Како експерт за монетарна политика, Славески важи за поборник на воздржано и ефикасно трошење на јавните средства.
Во трката за седумгодишниот мандат на чело на централната банка беа и Зоран Ставрески, поранешен министер за финансии и актуелен советник на премиерот Христијан Мицкоски, како и досегашната гувернерка Анита Ангеловска-Бежоска.
Предлогот за именување на Славески веќе е доставен до Собранието, потврди новинарката на Телма, Далиборка Демјанска Цветановска. Гувернерот се избира со просто мнозинство на предлог на претседателот на државата.
„Би сакале да потенцираме дека изборот беше тежок, со оглед на докажаниот квалитет на сите кандидати,“ соопшти кабинетот на Сиљановска-Давкова, додавајќи дека одлуката е донесена по консултации со премиерот Мицкоски.
Гувернерот на Народната банка е клучна фигура во креирањето на монетарната политика и е една од трите високи функции кои се предлагаат или именуваат од претседателот на државата.