Израелскиот началник на Генералштабот во петокот предупреди дека војната со Иран може да се продолжи на подолг рок, оценувајќи ја како најкомплексната воена кампања во историјата на земјата.
Американскиот претседател Доналд Трамп, во меѓувреме, изјави дека не е склoн да ја притиска Израел да ги прекине воздушните напади со цел продолжување на преговорите со Техеран. „Ако некој победува, потешко е да го спречиш, отколку кога губи“, рече Трамп.
Во Женева, обидите за дипломатски пробив меѓу европски и ирански претставници завршија без напредок. Според арапски и европски функционери запознаени со разговорите, иранскиот министер за надворешни работи Абас Аракчи и натаму инсистирал на правото на Иран да збогатува ураниум. Трамп, пак, оцени дека Иран сака да преговара со САД, а не со Европа.
Според Белата куќа, Трамп во четвртокот изјавил дека ќе донесе одлука за можен напад врз Иран „во рок од две недели“, што аналитичарите го сметаат за ризичен обид кризата околу иранската нуклеарна програма да се реши во негова корист. Лица упатени во процесот велат дека Трамп веќе ги одобрил нападите, но ја одложува акцијата за да види дали Техеран ќе се откаже од својата нуклеарна програма.
Израел и Иран продолжуваат со меѓусебни напади. Тел Авив соопшти во петокот дека со беспилотно летало е убиен уште еден ирански нуклеарен научник, а околу половина од иранските ракетни платформи биле уништени. Една ракета погодила во градот Хаифа, при што биле повредени најмалку 21 лице.
Инаку, САД продолжуваат со засилување на своето воено присуство во регионот. Трет американски разурнувач влегол во источниот Медитеран, а втора носачка група е упатена кон Арапското Море. Пентагон соопшти дека се работи за одбранбени мерки.
Портпаролот на Кремљ, Дмитриј Песков, изјави дека Русија би реагирала „многу негативно“ ако Израел, со поддршка од САД, се обиде да го ликвидира врховниот лидер на Иран. Според Песков, обид за промена на режимот во Техеран е „незамислив“.