Воениот портпарол на Израел, бригаден генерал Ефи Дефрин, ја прекина својата изјава во живо во петокот вечерта поради воздушна тревога, откако ирански ракетен напад ја погоди централна област во Израел, соопшти израелски официјален претставник.
Портпаролот претходно соопшти дека Израелските одбранбени сили (ИДФ) го нападнале нуклеарниот објект во Исфахан, најголемата постројка за збогатување ураниум во Иран, како дел од поширока воена операција.
ИДФ исто така објави дека погодиле над 200 цели во Иран.
Иранската државна новинска агенција јави дека противвоздушната одбрана била активирана во центарот на Техеран во петокот вечерта, во близина на комплексот на врховниот лидер ајатолах Али Хамнеи и претседателската палата.
Израелската телевизија N12, повикувајќи се на висок безбедносен извор, објави дека Израел планира да ги таргетира лидерите на иранската влада во Техеран доколку Иран лансира ракети кон населени подрачја во Израел.
Во меѓувреме, американскиот Стејт департмент издаде безбедносни предупредувања за неколку блискоисточни земји, вклучувајќи Иран, Ирак, Израел и Јордан, предупредувајќи на можни ракетни напади и препорачувајќи американските државјани да не патуваат во Иран.
„Американските државјани кои не можат да го напуштат Иран треба веднаш да се засолнат на безбедно место“, се наведува во соопштението.
САД исто така предупредија на можноста за проектили, дронови или ракети кои би прелетале над ирачкиот и јорданскиот воздушен простор, советувајќи луѓето во тие региони да побараат закрила и да избегнуваат изложување на паднати остатоци.