Градоначалничката на Скопје, Данела Арсовска, во отворено писмо до амбасадорот на Европската унија во земјата, Михалис Рокас, изрази загриженост поради, како што наведе, институционалната неактивност во однос на закани по нејзината безбедност и откривањето на криминални случаи во главниот град.
Писмото е објавено во време кога Скопје е домаќин на Самитот ЕУ–Западен Балкан, со присуство на еврокомесарката за проширување Марта Кос, и е наменето да ја алармира ЕУ за, како што тврди Арсовска, „институционалната заштита на криминални групи“.
„Во секоја држава има мафија, само во Македонија мафијата си има своја држава“, наведува Арсовска во пораката упатена до Кос преку амбасадорот Рокас.
Според Арсовска, Министерството за внатрешни работи не презело никакви дејства по нејзините пријави за закани, кои, како што вели, ги добива поради откривање на коруптивни случаи. Таа обвини дека не добила институционална заштита ниту како жена, ниту како избрана функционерка која не припаѓа на доминантните политички структури.
Во писмото, таа посочи и на неодамна откриена, како што ја нарекува, „организирана криминална мрежа“ во Општина Чаир, предводена од градоначалникот Висар Ганиу. Според Арсовска, оваа група со фалсификувани документи им овозможила на поединци, вклучително и малолетници, да стекнат значителни финансиски средства. Таа вели дека Основното јавно обвинителство веќе започнало истрага по овие наводи.
„Нашите инспектори беа изложени на насилство – гумите им беа пресечени со ножеви, добиваа закани по животот. Заканите се пријавени, но правдата доаѓа премногу бавно“, пишува Арсовска.
Таа побара од Европската комисија да го засили вниманието кон овие случаи, со порака дека европската поддршка би била сигнал дека корупцијата и организираниот криминал нема да се толерираат.
Европската комисија и Министерството за внатрешни работи засега не се изјаснија за овие наводи.