Во пресрет на Самитот ЕУ–Западен Балкан што се одржува денеска во Скопје, албанските политички лидери од Северна Македонија остварија одделни средби со премиерите на Косово и Албанија, испраќајќи силни пораки за поддршка на европската интеграција, но и загриженост за внатрешните политички случувања.
Заменик-премиерот и еден од лидерите на коалицијата ВЛЕН, Изет Меџити, на граничниот премин го пречека премиерот на Косово, Албин Курти, кој ќе учествува на самитот фокусиран на Планот за раст на ЕУ за регионот. Во објава на Фејсбук, Меџити го нарече Курти „пријател, брат и лидер на држава што секогаш стои покрај нас“.
Тој додаде дека пречекот бил симбол на почит и вреднување на врските меѓу двете земји, како и на заедничкиот ангажман за справување со регионалните предизвици и за европска иднина. „Разговаравме искрено за соработката, за нашите народи, за нашата патека кон Европа,“ напиша Меџити.
Паралелно, лидерот на албанската опозиција и претседател на ДУИ, Али Ахмети, се сретна во Скопје со премиерот на Албанија, Еди Рама. Во фокусот на разговорот беа европската интеграција на Северна Македонија, меѓуетничките односи, како и – според Ахмети – „сериозните закани врз Охридскиот договор“.
„Ја потенциравме заедничката европска иднина на регионот – нема поделби во овој процес,“ напиша Ахмети на Фејсбук, додавајќи благодарност до Рама за неговата континуирана поддршка на еднаквоста и евроинтеграциите на Албанците во Северна Македонија.
Самитот што се одржува во Скопје е насочен кон спроведувањето на Планот за раст, со цел забрзување на економската и политичката интеграција на земјите од Западен Балкан во Европската Унија.