Германија не е подготвена да го ревидира т.н. „француски предлог“ кој предвидува вклучување на Бугарите во Уставот на Северна Македонија, изјави германската амбасадорка во Бугарија Ирене Марија Планк.
Во интервју за подкастот на бугарската јавна телевизија БНТ, Планк истакна дека преговарачката рамка за евроинтеграција на Северна Македонија, која произлегува од тој предлог, е резултат на заеднички договор на сите 27 земји членки на ЕУ.
„Ова не е билатерално прашање, како што често слушаме. Ова е заедничка позиција на целиот Европски совет,“ рече Планк, отфрлајќи ги тврдењата дека рамката може да се предоговара.
Изјавата доаѓа во момент на засилен јавен фокус врз амбасадорката, откако таа присуствуваше на протест во Софија, што предизвика реакција од бугарското Министерство за надворешни работи.
Премиерот на Северна Македонија, Христијан Мицкоски, повеќепати тврдеше дека „францускиот предлог“ не е конечен и дека билатералните прашања со Бугарија ја попречуваат интеграцијата на Скопје во ЕУ. Планк ги отфрли ваквите наративи, нагласувајќи дека Берлин не поддржува отворање на преговарачката рамка.
„Не. Верувајте ми, ако постоеше простор за предоговарање, јас ќе знаев,“ рече таа.
Амбасадорката нагласи дека владеењето на правото и спроведувањето на меѓународните договори се суштински делови од пристапниот процес на Северна Македонија кон ЕУ.
Во однос на изградбата на Коридорот 8 – транспортна врска меѓу Бугарија, Северна Македонија и Албанија – Планк изрази незадоволство од динамиката на проектот.
„Изградбата не напредува со темпото што го очекуваме. Владата во Скопје не смее да ги пренасочува средствата предвидени за Коридор 8 кон Коридор 10, што води кон Србија,“ рече таа.
Сепак, таа изрази умерен оптимизам по неодамнешната средба на министрите за транспорт на Бугарија и Северна Македонија во Истанбул, при што, според неа, било постигнато начелно решение за изградба на граничен тунел.
„Овој проект е важен не само за регионалната поврзаност, туку и за стабилноста во поширокиот контекст,“ изјави Планк, додавајќи дека Коридорот 8 има стратешка улога и за Украина во контекст на руската инвазија.
Таа потсети дека новиот германски министер за надворешни работи неодамна ја посетил Украина и пренел порака за „сеопфатна поддршка“ од Берлин кон Киев.