Демократската унија за интеграција (ДУИ) изрази загриженост во врска со најавениот проект за изградба на нови објекти во просторот на Скопското Кале, оценувајќи дека ваквите интервенции го нарушуваат историскиот и културен интегритет на локалитетот.
„Наместо зачувување и промоција на историските вредности, постои ризик од уредувања што ќе го нарушат автентичниот архитектонски изглед и значењето на Калето, кое е од посебна важност за сите граѓани“, се наведува во соопштението на партијата.
ДУИ потсетува дека Калето е вековен симбол на соживотот и мултиетничката историја на земјата, и предупредува дека претходните интервенции без научен и реставраторски пристап сега може да бидат дополнети со нови градби кои не ја одразуваат историската реалност и ја поткопуваат културната автентичност.
Партијата смета дека Калето не треба да се користи како платформа за политички поени или симболички наметнувања. „Секој иден проект мора да биде заснован на професионални стандарди и со целосна почит кон заедничкото културно наследство“, истакнува ДУИ.
Од Министерството за култура и надлежните институции се бара итен прекин на сите иницијативи што можат да го нарушат историскиот идентитет на локалитетот, како и вклучување на експерти од областа на културното наследство, археолози и историчари, со цел секоја интервенција да биде транспарентна и лишена од политизација и етнизација.
„Скопското Кале треба да се зачува и реставрира – а не да се надградува и преосмислува според дневно-политички агенди. Заштитата на неговиот автентичност е заедничка одговорност и придонес кон изградба на зрелo и еднакво општество за сите“, се наведува во соопштението.