Коалицијата ВЛЕН се соочува со внатрешни несогласувања околу подготовките за претстојните локални избори, откако партијата Алтернатива изрази интерес за кандидатура во една од двете скопски општини – Чаир или Сарај – што предизвика напнатост меѓу коалициските партнери, пишува порталот на Албански јазик Тетовасот (TS).
Според TS, на еден од состаноците на коалицијата дошло до вербален судир меѓу претставникот на Алтернатива, Зеќирја Ибрахими, и лидерот на Демократско движење, Изет Меџити. Несогласувањето се однесувало на барањето на Алтернатива да добие поддршка за кандидатура во една од двете споменати општини. Наводно, Арбен Фетаху се обидел да ја смири ситуацијата, повикувајќи на воздржаност и повикувајќи се на анкетни податоци кои покажуваат поголема поддршка за движењето на Меџити.
Конфликтот се продлабочи откако актуелниот министер за здравство, Беким Сали од Алтернатива, во петокот ја најави својата кандидатура за градоначалник на Чаир, велејќи дека „за Чаир одлучуваат граѓаните, не имињата“, што дел од медиумите го протолкуваа како индиректна порака до Меџити.
И покрај јавните несогласувања, лидерите на ВЛЕН објавија фотографија на социјалните мрежи на која се прикажани заедно и насмеани. Активистката на ВЛЕН, Нафие Селмани, ја коментираше фотографијата со зборовите: „Кога постираат насмеани фотографии – тогаш се најмногу скарани.“
Во меѓувреме, портпаролката на Владата, Венера Азизи, ја сподели истата фотографија со опис: „Рамо до рамо, на патот кон победата“, сигнализирајќи подготвеност на ВЛЕН за настап на локалните избори кои треба да се одржат во октомври.
Коалицијата ВЛЕН, составена од неколку партии од албанскиот политички блок, освои 14 пратенички места на последните парламентарни избори, но останува нејасно дали ќе успее да ги надмине внатрешните разлики во пресрет на новиот изборен циклус.