Родителите на децата загинати во пожарот во дискотеката „Пулс“ во Кочани повторија дека бараат правда, а не одмазда, на денешниот 32. „Марш за ангелите“ што се одржа низ градските улици.
Стотина граѓани се приклучија на маршот, организиран во знак на протест поради текот на судскиот процес за трагедијата во која на 16 март загинаа 63 лица. Родителите порачаа дека судницата „не смее да се претвори во Струшки вечери на поезијата“, алудирајќи на, како што велат, непотребни одложувања и преголема формалност во постапката.
Маршот започна од Паркот на револуцијата во 14:05 часот, а учесниците носеа фотографии од загинатите и транспаренти со повици за одговорност. Организаторите најавија дека ќе продолжат со протестите сè додека, како што наведоа, не добијат „фер и брза правна разрешница“ за случајот.