Нападот врз градоначалничката на Скопје, Данела Арсовска, за време на нејзината службена контрола на дивоградби во општина Чаир, предизвика лавина од реакции во јавноста и меѓу политичарите, откако беше објавено дека полицијата не интервенирала навреме за да го спречи инцидентот.
Арсовска објави дека била физички нападната од група мажи, додека, според неа, припадници на Министерството за внатрешни работи (МВР) набљудувале без да преземат мерки. „Бев удирана со клоци, ми се закануваа со силување и убиство на моето семејство,“ рече таа во видео обраќање на социјалните мрежи. Таа тврди дека полицијата одбила да прими пријава и дека институциите се обидуваат да го прикријат случајот.
Министерот за внатрешни работи, Панче Тошковски, изјави дека се приведени три лица поврзани со нападот, но нагласи дека „треба да се почека да се утврдат сите факти“. Тој изрази загриженост дека „оној што се претставува како жртва можеби го иницирал физичкиот конфликт“. Според надзорна снимка објавена од медиумите, се гледа како Арсовска прва го удира со клоци еден од мажите, кој потоа возвраќа.
Премиерот Христијан Мицкоски повика институциите да постапат. „Државата има институции и тие треба да дејствуваат,“ рече тој во изјава за медиумите.
Хелсиншкиот комитет за човекови права побара итна истрага против полициските службеници кои не реагирале за време на нападот. „Ова претставува сериозен пропуст и загрозување на безбедноста на јавни функционери,“ соопштија од организацијата.
Политичари од сите страни остро го осудија нападот. Пратеничката на СДСМ, Славјанка Петровска, изјави дека „насилството не смее да стане новото нормално“. Партијата Левица обвини дека непостапувањето на МВР е резултат на политички договори во владината коалиција. Градоначалникот на Карпош, Стевчо Јакимовски, праша дали „мора некој да биде убиен за да се освестиме“.
Градоначалникот на Чаир, Висар Ганиу, го осуди нападот, нагласувајќи дека Општина Чаир нема никаква поврзаност со инцидентот.
Адвокатката и универзитетска професорка Сузана Јошевска-Анастасовска ја критикуваше „молчаливоста на институциите“ и ја обвини полицијата дека ги штити насилниците. „Токму затоа жените завршуваат мртви во оваа држава,“ напиша таа на социјалните мрежи.
Арсовска, која минатата година раскина со коалицијата што ја поддржа на изборите, останува контроверзна фигура во јавноста, но нападот врз неа ја отвори дебатата за неказнивоста, родово базираното насилство и злоупотребата на институциите за политички цели.