Албанија и Европската Унија во Брисел ја одржаа Меѓувладината конференција што го означува почетокот на фазата за затворање на поглавјата од преговорите за членство во ЕУ, во момент што премиерот Еди Рама го оцени како историски за европскиот пат на земјата.
Средбата, која траеше повеќе од еден час, се одржа по одлуката на Комитетот на постојани претставници на земјите членки на ЕУ (COREPER), кој потврди дека Албанија ги исполнила меѓуусловите во кластерот „Темели“.
На прес-конференцијата по состанокот, Еди Рама изјави дека Албанија постигнала „голем напредок“ и „урнала уште еден рекорд“ во процесот на преговори.
„Ова е процес на градење држава. Тој е темел за подобри плати и поголеми инвестиции. Ќе бидеме дел од ова семејство во текот на оваа деценија“, рече Рама.
Тој нагласи дека Албанија останува „100 проценти усогласена со надворешната политика на Европската Унија“, додавајќи дека земјата никогаш не гледала на ветото како политичка алатка.
„Ние сме фанатици на Европската Унија. Фанатиците на ЕУ не можат да ставаат вето на одлуките на ЕУ“, изјави Рама.
Еврокомесарката за проширување Марта Кос ја пофали Албанија за напредокот во реформите во правосудството, посочувајќи ги процесот на ветинг и формирањето на СПАК како клучни достигнувања.
„Го видовме ветингот на стотици судии и обвинители. Го видовме создавањето на СПАК, кој може да стане најдоверливата институција во Албанија“, рече Марта Кос.
Сепак, таа предупреди дека пред земјата има уште многу работа и дополнителни реформи пред целосното членство во Европската Унија.
Во текот на конференцијата беше спомнато и писмото на германскиот канцелар Фридрих Мерц за „иновативни решенија“ за интеграцијата на Западен Балкан во ЕУ. Рама порача дека кандидатите од регионот „не треба да се делат“, додека Марта Кос оцени дека идеите на Мерц се „плодни за дискусија“.
За Албанија, конференцијата има клучно значење бидејќи ги поставува завршните критериуми за кластерот „Темели“, кој ги опфаќа поглавјата за правосудство, фундаментални права, безбедност, јавна администрација и економски критериуми.