Велика Британија работи со јорданските власти за да овозможи британска хуманитарна помош да се достави со авиони во Појасот Газа, изјави премиерот Киер Стармер, додека расте притисокот врз него да ја признае државноста на Палестина.
“Веќе итно соработуваме со јорданските власти за британската помош да стигне до Газа со авиони,” напиша Стармер во авторски текст за весникот Mirror. Тој додаде дека веста оти Израел ќе дозволи странски воздушни дропови на помош доаѓа “премногу доцна”, но дека Британија ќе стори сѐ што може за да обезбеди доставата.
„Сликите од глад и очај во Газа се крајно вознемирувачки“, наведе Стармер.
Израел во петокот соопшти дека ќе дозволи храна и залихи од странски земји да бидат доставени по воздушен пат во наредните денови.
Шефот на Светската здравствена организација, Тедрос Аданом Гебрејесус, неделава изјави дека Газа се соочува со „вештачки предизвикан“ масовен глад поради блокадата на хуманитарна помош. Светската програма за храна на ОН предупреди дека речиси секој трет жител во Газа минува денови без храна.
Сепак, воздушните дропови се критикувани како опасни и неефикасни. Шефот на Агенцијата на ОН за помош на палестински бегалци (UNRWA), Филип Лазарини, на социјалните мрежи ги нарече воздушните дропови „дистракција и чадна завеса“.
„Тие нема да го запрат продлабочувањето на гладот. Скапи се, неефикасни и можат дури и да ги убијат изгладнетите цивили“, рече Лазарини.
Стармер, кој се соочува со засилен повик од пратеници и министри од сопствената влада да ја признае палестинската државност, повтори дека „признавањето на палестинска држава мора да биде дел од поширокиот план“ за постигнување траен мир и безбедност за Палестинците и Израелците.
Претседателот на Франција, Емануел Макрон, оваа недела изјави дека Париз планира да ја признае Палестина на Генералното собрание на ОН во септември. Од друга страна, италијанската премиерка Џорџа Мелони предупреди дека признавање на држава што сѐ уште не е воспоставена може да биде „контрапродуктивно“.
„Ако нешто што не постои се признае на хартија, може да изгледа како проблемот да е решен, а всушност да не е,“ рече Мелони.