Демократската унија за интеграција (ДУИ) изрази загриженост поради, како што вели, континуираното непочитување на Законот за употреба на јазиците од страна на Владата на Северна Македонија, особено поради тоа што записниците од владините седници не се објавуваат и на албански јазик.
Според партијата, од 10 јуни 2025 година наваму се одржани 14 седници на Владата, но ниту еден записник не е преведен и објавен на албански јазик на официјалната веб-страница на институцијата, што го сметаат за „отворено кршење на законот и намерен чин на дискриминација кон албанскиот јазик и албанските граѓани“.
ДУИ оценува дека образложенијата за „технички доцнења“ се неприфатливи и понижувачки. „Албанскиот јазик е службен јазик во Република Северна Македонија, а обврската за еднаков превод и објава е предвидена со закон“, наведуваат од партијата, додавајќи дека секое отстапување од оваа обврска претставува негирање на мултиетничкиот карактер и рамноправноста загарантирани со Уставот и Охридскиот договор.
Партијата смета дека климата на дискриминација се поттикнува од политички субјекти кои, како што велат, и натаму го оспоруваат постоењето на самиот закон за јазици. Тие потсетуваат дека ВМРО-ДПМНЕ е официјален подносител на иницијативата за укинување на законот пред Уставниот суд – институција што, според нив, наместо да биде гарант на еднаквоста, се претвора во параполитички инструмент за уривање на придобивките од Охридскиот договор.
ДУИ ја повика Владата итно да ја запре оваа, како што ја нарекуваат, исклучувачка пракса и да преземе итни мерки за целосно и навремено спроведување на Законот за употреба на јазиците. „Секое занемарување на албанскиот јазик е занемарување на албанските граѓани и на самите темели на соживотот во државата“, се вели во соопштението.
Партијата најави дека нема да премолчи пред, како што го нарече, институционалниот деградациски однос. „Албанските граѓани не се граѓани од втор ред и заслужуваат целосна почит во секој документ, на секоја платформа и во секоја постапка на државните институции“, заклучуваат од ДУИ.