Лидерот на Демократската унија за интеграција (ДУИ), Али Ахмети, во вторникот им се обрати на македонските граѓани на македонски јазик, нагласувајќи дека Албанците во земјата се залагаат за унитарна, заедничка и еднаква Македонија и повикувајќи на заемно почитување и заедничка работа за европска иднина.
Обраќањето, објавено во колумна за порталот „360 степени“ по повод 24-годишнината од потпишувањето на Охридскиот рамковен договор, доаѓа, како што вели Ахмети, во услови на „кампањи за оцрнување и намерно негативно претставување пред Македонецот“.
„Јас и Албанците, вчера, денес и утре, се залагаме за унитарна, заедничка и еднаква Македонија – ниту само моја, ниту само твоја, туку секогаш наша Македонија“, напиша Ахмети, истакнувајќи дека ваквиот став го делеле и неговите претходни политички противници, но дека низ годините бил обвинуван за сепаратизам, национализам и шовинизам.
Ахмети потсети дека пред потпишувањето на мировниот договор, Албанците биле лишени од право на еднаквост, а нивните јазик и знаме биле оспорувани. „Намерно и лажно се сееше страв кон Албанците за да се владее преку поделби, наместо да се работи за заедничка иднина“, рече тој.
Според лидерот на ДУИ, Охридскиот договор бил пресвртна точка – ракување и ветување за изградба на заедничка, еднаква и евроатлантска татковина. Но, процесот не бил лесен и наидувал на отпор од политички елити кои размислувале за избори, а не за идните генерации, додаде тој.
Ахмети тврди дека во изминатите две децении ДУИ работела на спроведување на договорот, интеграција на земјата во НАТО и напредок кон Европската унија, како и на инфраструктурни и институционални проекти – од автопатишта и универзитети до болници и училишта. „Се покажа дека кога државата е лојална кон граѓаните, и граѓаните се лојални кон државата“, истакна тој.
Ахмети ја критикуваше, како што ја нарече, „пропагандата“ дека правата на Албанците ќе ја федерализираат земјата или ќе ја доведат до распад. „Денес, 24 години по Охридскиот договор, Македонија постои, е членка на НАТО и е определена за европска иднина“, нагласи тој.
Лидерот на ДУИ повика Македонците да ги почитуваат засебностите на Албанците и да разберат дека од еднаквоста „не губат ништо, туку добиваат многу“.
„Само заедно, со заемно почитување, без предрасуди и со искрено залагање еден за друг, може да изградиме праведно и еднакво општество што ќе се залага за европски вредности во европски интегрирана земја и регион“, заклучи Ахмети.