Европратеникот од редовите на Европската народна партија, Андреј Ковачев, побара итно усвојување на измените во Законот за бугарско државјанство, за време на средба со бугарски новинари во Брисел.
„Во моментов законот е нелогичен и не придонесува за легитимирање на бугарската заедница во Република Северна Македонија,“ изјави Ковачев, повикувајќи ги медиумите да ја пренесат неговата порака до пратениците во бугарскиот парламент и до министерот за правда.
Предложените измени предвидуваат дел од личните податоци на лицата што стекнале бугарско државјанство да станат јавни, со што ќе се покаже дека тие доброволно се изјасниле како етнички Бугари.
Ковачев додаде дека ваквиот чекор ќе потврди и колку е голема бугарската заедница во Северна Македонија, која веќе поседува бугарски документи за лична идентификација.
„Ти доброволно доаѓаш и велиш: ‘Еве, баба и дедо ми се Бугари. Еве ги документите дека биле во егзархијата, војската или бугарското училиште. Јас потпишав декларација дека се чувствувам етнички Бугарин, и врз основа на тоа добивам бугарско државјанство’,“ изјави Ковачев.