„Џонсон и Џонсон“ (J&J) објави дека постигнал договор за исплата од 5,5 милијарди долари за решавање на околу 69.000 тужби во американските федерални и државни судови, што претставува 99,75 проценти од сите нерешени случаи поврзани со производите на база на талк.
Спогодбата ќе стане конечна доколку ја прифатат најмалку 95 проценти од тужителите.
Талкот е природен минерал што со децении се користеше во козметички производи и бебешка пудра. Во 2024 година, Светската здравствена организација (СЗО) го класифицираше како супстанција што е „веројатно канцерогена за луѓето“.
Компанијата и натаму тврди дека нема научни докази кои покажуваат дека талкот предизвикува рак. Сепак, продажбата на бебешката пудра на база на талк во САД беше прекината во 2020 година, а на глобално ниво во 2023 година.
Првиот значаен судски случај беше во 2016 година, кога американска порота досуди 72 милиони долари на семејството на жена која починала од рак на јајниците. Иако пресудата подоцна беше поништена, бројот на тужби продолжи да расте, а повеќе американски пороти донесоа пресуди во корист на тужителите.
Шефот на правниот сектор на компанијата, Ерик Хас, изјави дека договорот ќе ѝ овозможи на компанијата конечно да го затвори ова долгогодишно прашање. Адвокатите на тужителите, пак, оценија дека спогодбата претставува задоволително решение по речиси една деценија судски постапки.
Спогодбата не ги опфаќа тужбите во Обединетото Кралство, каде пред Високиот суд се води најголемиот случај за одговорност за производ во британската историја, со повеќе од 7.000 потенцијални тужители. Во таа постапка се тврди дека компанијата знаела за можните ризици од талкот, но продолжила да го продава производот – обвинувања што „Џонсон и Џонсон“ ги отфрла.