ДУИ денеска соопшти дека јавноста сè уште чека одговори за тоа како директорот на НОМАГАС, Недим Рама, од бизнис со rent-a-car стигнал до луксузни апартмани во Маврово, додека, според партијата, во анкетниот лист до ДКСК не пријавил недвижен имот.
Од ДУИ велат дека, според јавни документи и имотни листови, Недим Рама и лицето со иницијали Л.Х. се поврзани со недвижности во Маврово, односно со апартмани во атрактивен туристички комплекс.
„Станува збор за имот што во јавноста се промовира како луксузно сместување, а отвора сериозни прашања за потеклото на капиталот, особено ако се има предвид дека директор на државна компанија нема пријавено ниту еден имот во анкетниот лист до ДКСК“, наведуваат од ДУИ.
Партијата тврди дека Л.Х. преку компанијата „Vision Media“ ги рекламира апартманите на Недим Рама на дигитален видео-бим на плоштадот „Македонија“ во Скопје.
Според ДУИ, „Vision Media“ е компанија за дигитално рекламирање во сопственост на Л.Х. и „Strato Consulting“, а сопственик на „Strato Consulting“ е лицето со иницијали Б.М., за кое велат дека е основач на портал близок до Изет Меџити.
ДУИ наведува дека токму тој портал бил еден од медиумите што континуирано се рекламирале на тие видео-бимови.
„Се поставува прашањето дали станува збор за случајна деловна соработка или за затворен круг на бизнис, медиумско и политичко влијание“, соопшти партијата.
Од ДУИ посочуваат и на финансиски извештај од локалните избори во 2025 година, според кој коалицијата ВЛЕН исплатила 580.820 денари за рекламирање на интернет-портали, при што најголем дел од средствата завршиле кај порталот што го споменуваат во соопштението.
Партијата постави повеќе прашања до институциите, меѓу кои дали приходите од издавање на апартманите редовно се пријавуваат и оданочуваат, како и од кои извори се финансира скапото рекламирање во центарот на Скопје.
ДУИ ги повика институциите да не молчат и побара детална истрага за финансиските текови, сопственичките врски и политичко-медиумските релации.
„Граѓаните заслужуваат одговори“, наведуваат од партијата.