СДСМ ја критикуваше изјавата на премиерот Христијан Мицкоски дека Владата се консултира со експерти за состојбата со водоснабдувањето во Гостивар, оценувајќи дека стручните лица требало да бидат вклучени уште на почетокот на кризата.
Во партиското соопштение се наведува дека, наместо стручни проценки, јавноста во изминатиот период слушала различни и, според СДСМ, контрадикторни изјави од надлежните институции и носителите на извршната власт.
Опозициската партија оценува дека премиерот не требало лично да ја објаснува состојбата со квалитетот на водата, ниту министерот за внатрешни работи да коментира прашања што, според неа, се во надлежност на стручните институции.
СДСМ прашува дали најавените консултации со експерти претставуваат признание дека досегашното постапување било погрешно или обид да се оправда претходното управување со кризата.
Партијата побара институционална одговорност за случајот со загадената вода во Гостивар и повика да се утврди кој ќе сноси одговорност за последиците од кризата.