Демократската унија за интеграција (ДУИ) и владејачката коалиција ВЛЕН влегоа во јавен судир околу улогата на српскиот капитал во Северна Македонија, по најавите за влез на „Alta Bank“ на домашниот банкарски пазар.
ДУИ, сега во опозиција, соопшти дека присуството на „Alta Bank“ не е обична финансиска инвестиција, туку „структуриран политички и економски потег“ од Белград, со цел обезбедување контрола врз клучни институции во земјата. Партијата обвини дека процесот се одвива со поддршка од владините партнери, вклучувајќи го и ВЛЕН.
Според извори од Народната банка кои ги цитира ДУИ, управувањето со „Alta Bank“ во земјата се очекува да го преземе поранешната членка на ВМРО-ДПМНЕ и поранешна заменик-гувернерка Маја Кадиевска Војновиќ. Партијата тврди дека назначувањето е резултат на лобирање од премиерот Христијан Мицкоски кај српскиот претседател Александар Вучиќ.
ДУИ исто така тврди дека гувернерот на Народната банка, Трајко Славевски, ветил дека ќе ги отстрани сите пречки за влезот на „Alta Bank“, и покрај предупредувањата на стручните лица за можни негативни ефекти врз финансискиот углед на државата.
Партијата го поврзува овој потег со поширока стратегија на владата, која, според неа, вклучува приоритизирање на инфраструктурни проекти кон Србија, присуство на проруски политички фигури и вклучување на српски верски претставници во државни активности.
ВЛЕН реагираше со тврдење дека токму ДУИ, за време на нејзините години во владата, го зајакнала српското влијание и го запоставила Косово. Коалицијата наведе дека тогаш биле воспоставени брзи ленти и олеснето движењето кон Србија, додека соработката со Косово била минимална.
ВЛЕН побара од ДУИ да објави записи од средби со српски претставници и да објасни зошто соработката со Косово била ограничена.
Двете страни своите позиции ги поврзаа со стратешката ориентација на Северна Македонија и нејзините економски и безбедносни приоритети.