Рускиот одбранбен сектор преку посредништво на полски компании во 2016 година испорачал резервни делови за борбените хеликоптери Ми-24 на македонското Министерство за одбрана, покажуваат документи објавени од истражувачките мрежи InformNapalm и Militant Intelligence, пренесува Инбокс7.
Истражувањето открива дека полските компании делувале како посредници меѓу државни институции и руската корпорација „Ростех“, заобиколувајќи ги санкциите воведени против Москва по анексијата на Крим во 2014 година.
Договори вредни стотици илјади евра
Еден од договорите, потпишан во 2015 година, бил дополнет во 2016 година со авансна уплата од 70 проценти од вкупната вредност, или 543.690 евра, се наведува во документите.
Исплатите биле извршени преку руската банка „Новикомбанк“, користејќи кореспондентска сметка во германската „Комерцбанк“ во Франкфурт. Тоа, според аналитичарите, покажува дека руската воена индустрија продолжила да користи европски финансиски канали и по воведувањето на санкциите.
Друг документ од 2016 година открива писмо на полската компанија Polit-Elektronik до „Руски хеликоптери“, во кое се согласува на распоред за испорака на лопати за ротори на хеликоптери Ми-24 што ги користело македонското Министерство за одбрана.
Во процесот била вклучена и државната полска фабрика Wojskowe Zakłady Lotnicze No.1 (WZL-1) од Лоѓ, која одржува и модернизира советски произведени хеликоптери Ми-2, Ми-8/17, Ми-14 и Ми-24.
Според истражувачите, преку оваа шема Полска и Русија координирале воени проекти за трета држава – Македонија. Полските компании посредувале за да ѝ овозможат на руската воена индустрија учество на меѓународни тендери, и покрај ограничувањата наметнати од ЕУ и САД.
„Ова е пример за тоа како руските компании наоѓале патишта да ги заобиколат санкциите и да останат присутни на европскиот пазар за одбрана,“ наведува InformNapalm.
Македонските хеликоптери подоцна предадени на Украина
Северна Македонија во 2023 година официјално се согласи да ги префрли своите хеликоптери Ми-24 на Украина како дел од воената помош за одбраната од руската инвазија. Не е исклучено, велат експертите, дека дел од тие летала содржеле компоненти обезбедени преку договорите со Полска и Русија.
Министерството за одбрана во Скопје не одговори веднаш на барањето за коментар околу објавените документи.