Лидерите на шест европски земји и Европската комисија повикаа на засилување на притисокот врз Русија и поддршка за Украина пред претстојниот самит меѓу американскиот претседател Доналд Трамп и рускиот претседател Владимир Путин во Аљаска.
Во заедничката изјава објавена в сабота, Франција, Италија, Германија, Полска, Обединетото Кралство и Европската комисија истакнаа дека единствениот пат кон мир е преку активна дипломатија, поддршка за Украина и одржување на притисокот врз Москва.
„Патот кон мирот во Украина не може да се одлучува без Украина,“ наведоа тие, нагласувајќи ја важноста од силни безбедносни гаранции кои ќе и овозможат на Украина да ја брани својата сувереност и територијален интегритет.
Украинскиот претседател Володимир Зеленски во неделата рече дека Киев нема да отстапи територии на Русија за да купи мир, и ја поддржа изјавата на европските лидери.
Американскиот претседател Доналд Трамп најави дека ќе се сретне со Путин во Аљаска в петок, наведувајќи дека двете страни се блиску до договор кој може да ја реши војната, но детали за евентуален договор не се соопштени.
Според Трамп, договорот би можел да вклучува „размена на територии во полза на двете страни“, што предизвика загриженост кај Украина и нејзините европски сојузници дека тоа ќе поттикне дополнителна руска агресија.
Средбата следи по разговорите што американскиот потпретседател Џ.Д. Ванс ги имаше со британскиот министер за надворешни работи и претставници на Украина и европските земји во Чивнинг хаус, Лондон, каде беше разгледана иницијативата на Трамп за мир.
Европските претставници понудија контрапредлог кој вклучува прекин на огнот пред било какви територијални промени и меѓусебни гаранции за безбедност, објави Reuters повикувајќи се на европски извори.
Премиерот на Обединетото Кралство Кеир Стармер и францускиот претседател Емануел Макрон порачаа дека се посветени на постигнување праведен и траен мир и ја поздравија посветеноста на Трамп за завршување на конфликтот.
Макрон посочи дека иднината на Украина мора да се одлучува од самите Украинци, додавајќи дека Европа исто така мора да биде дел од решението поради сопствената безбедност.
Самитот во Аљаска ќе биде прв состанок на актуелни претседатели на САД и Русија по средбата на Џо Бајден и Путин во Женева во 2021 година.
Во меѓувреме, жестоки борби продолжуваат на источниот и јужниот фронт во Украина, каде руските сили контролираат околу петтина од територијата на земјата.