Руското Министерство за вонредни ситуации соопшти во неделата дека е можно појава на цунами во три области на полуостровот Камчатка на рускиот Далечен Исток, откако земјотрес со јачина од 7,0 степени го погоди подрачјето околу Курилските Острови.
„Иако се очекуваат ниски бранови, граѓаните мора да се оддалечат од брегот,“ соопшти Министерството преку апликацијата Телеграм, откако беше регистрирана последната сеизмичка активност во регионот.
Системот за предупредување од цунами на Пацификот, кој ја потврди јачината на земјотресот на 7,0 степени, соопшти дека не е издадено формално предупредување за цунами. Исто така, Геолошкиот институт на САД ја потврди јачината на потресот.
Во меѓувреме, руските државни медиуми и научници информираа дека преку ноќта за првпат по 600 години еруптираше вулканот Крашенников на Камчатка. Според нив, и земјотресот и ерупцијата може да се поврзани со силниот потрес кој минатата недела го погоди рускиот Далечен Исток, предизвикувајќи предупредувања за цунами дури и во Француска Полинезија и Чиле. Тој потрес беше проследен со ерупција и на најактивниот вулкан во регионот – Кључевскаја Сопка.
Курилските Острови се протегаат од јужниот дел на Камчатка кон Јапонија. Руските научници уште во средата предупредија дека се можни силни последователни потреси во текот на наредните недели.
„Ова е првпат во историјата потврдено дека вулканот Крашенников еруптирал по 600 години,“ изјави Олга Гирина, раководителка на тимот за одговор при вулкански ерупции во Камчатка, според агенцијата РИА.
Преку Телеграм каналот на Институтот за вулканологија и сеизмологија, Гирина појасни дека последното истекување на лава од Крашенников се случило околу 1463 година, и оттогаш не е забележана ниту една ерупција.
Филијалата на Министерството за вонредни ситуации во Камчатка соопшти дека е забележан столб од пепел висок 6.000 метри (околу 3,7 милји) по ерупцијата. Самата вулканска купа достигнува височина од 1.856 метри.
„Облакот од пепел се движи кон исток, во правец на Пацификот. На неговиот пат нема населени места,“ се наведува во соопштението на Министерството.
Ерупцијата на вулканот добила портокалов авијациски код, што укажува на зголемена опасност за воздушниот сообраќај.