Во петокот (17 јануари 2025 година), заменичката генерален секретар на НАТО, Радмила Шекеринска, ја заврши тридневната посета на Литванија, каде што учествуваше на „Снежниот состанок 2025“ во Тракаи и ги посети силите на НАТО во воената база Рукла.
На „Снежниот состанок“, годишен форум на високо ниво организиран од Министерството за надворешни работи на Литванија за справување со безбедносните предизвици на евроатлантската заедница, Шекеринска ја нагласи важноста од зголемување на трошоците и производството за одбрана, поддршката за Украина и спротивставувањето на непријателските активности против сојузниците на НАТО.
„Русија е најзначајната закана за нашата безбедност. Таа сака да ја избрише Украина од мапата,“ изјави Шекеринска, додавајќи дека Москва активно соработува со Кина, Иран, Северна Кореја и Белорусија за да го ослаби единството на сојузниците и да ја обесхрабри поддршката за Украина. „Тие нема да успеат,“ порача таа.
Заменичката генерален секретар се осврна и на растечките закани од сајбер-напади, дезинформации, политичко мешање и саботажи насочени кон сојузниците. Таа го истакна лансирањето на Балтичка стража од страна на НАТО, иницијатива за зајакнување на безбедноста во Балтичкото Море. Осврнувајќи се на претстојниот Самит на НАТО во Хаг, Шекеринска истакна дека сојузниците ќе усвојат ажурирана стратегија за спротивставување на овие закани. Таа повика на надминување на границата од 2% од БДП за одбранбени трошоци, потенцирајќи дека сегашните закани бараат поголеми инвестиции.
За време на посетата на воената база Рукла, Шекеринска се сретна со војниците од Предните копнени сили на НАТО, предводени од Германија, како и со литванската бригада „Железен волк“. Таа ја пофали нивната професионалност и посветеност, истакнувајќи ја решителноста на НАТО.
„Вашето присуство испраќа јасна порака: Литванија не е сама. НАТО ќе спречи каква било агресија. Еден за сите, сите за еден,“ изјави Шекеринска.
Посетата на Шекеринска вклучуваше и средби со претседателот на Литванија, Гитанас Науседа, министерот за надворешни работи, Кестутис Будрис, и министерката за одбрана, Довиле Шакалиене. Во средата, таа го отвори осмиот Трансатлантски конференциски форум за политики во Вилнус.