Претседателката на Северна Македонија, Гордана Сиљановска-Давкова, во понеделникот остро ги осуди навредливите скандирања што се случија за време на кошаркарскиот натпревар меѓу Македонија и Романија во Куманово, нарекувајќи ги „куршуми на омраза“ и предупредувајќи дека таквото однесување ја срами целата држава.
„Срамот не е само на оние чии зборови повредуваат, туку и на сите кои присуствуваа, на клубот, на градот, на државата, на спортот“, напиша таа на социјалните мрежи. „Навивачката омраза мора јасно да се осуди и да ѝ се спротивставиме“, додаде таа.
Случајот предизвика низа реакции од политички и спортски институции откако на трибините се слушнаа ксенофобични и антималцински повици. Инцидентот се случи за време на пријателскиот натпревар што се одигра во саботата во Куманово.
Министерот за внатрешни работи, Панче Тошковски, изјави дека полицијата постапува по упатства од Јавното обвинителство и дека се обезбедуваат видео-снимки со цел да се идентификуваат сторителите.
Премиерот Христијан Мицкоски, кој бил присутен на натпреварот, исто така изрази жалење поради инцидентот. Тој рече дека не ги слушнал скандирањата, но ги нарече „неприфатливи“ и најави дека случајот ќе биде целосно расчистен.
Од СДСМ и ДУИ побараа политичка одговорност од функционери од коалицијата „Вреди“, додека Кошаркарската федерација и општина Куманово официјално го осудија однесувањето на дел од публиката.
Во писмен одговор до Радио Слободна Европа, Меѓународната кошаркарска федерација (ФИБА) соопшти дека отворила истрага за инцидентот и ја осуди „секојашната употреба на говор на омраза, дискриминаторски и расистички изрази во спортот“.
Сиљановска-Давкова повика на култивирање на спортската култура и образување на навивачите, посочувајќи дека „страстенo навивање не смее да биде навредливо и агресивно“.
„Ни треба азбука на навивање – спортско описменување, бидејќи победата е пирова ако е проследена со говор или акти на омраза“, додаде претседателката.