Градоначалничката на Скопје, Данела Арсовска, изнесе нови обвинувања за урбанистички криминал во скопската општина Чаир, тврдејќи дека во моментов се градат 50 нелегални згради без дозволи, додека надлежните институции не преземаат никакви мерки.
Наутро, преку објава на социјалните мрежи, Арсовска објави сателитски снимки за кои вели дека прикажуваат тековна незаконска градба во Чаир. Таа директно го прозва градоначалникот на општината, Висар Ганиу, обвинувајќи го за негрижа и соучесништво.
„Нека му пренесе некој на Висар Ганиу дека ова не му е оставено во наследство од баба му, бидејќи тврдеше дека дивоградбите ги наследил, а овде сега се гради. 50 нови згради во моментов и никој не реагира. Немаат дозволи, немаат проекти, крадат вода, крадат струја“, изјави Арсовска.
Таа додаде дека како градоначалничка има законска обврска да реагира во случаи кога е загрозен Буџетот на градот, особено кога, според неа, постојат докази за фалсификување службени документи.
„Кога имаме информација или пријава дека се оштетува буџетот за градот, и кога сме сведоци на докази за фалсификувани службени документи, согласно закон сме обврзани истото да го пријавиме. Во спротивно, со молк стануваме соучесници во криминалот со незаконските легализации“, додаде таа.
Од Општина Чаир засега нема официјален одговор на обвинувањата. Арсовска во изминатите месеци повеќепати јавно обвинуваше за урбанистички злоупотреби во оваа скопска општина, но реакциите од локалните власти остануваат ограничени.