Жителите на Скопје и Куманово се жалат дека ѓубрето не се собира редовно и дека непријатниот мирис ги тера да ги држат прозорците затворени, додека градските и општинските власти меѓусебно се обвинуваат за колапсот во управувањето со отпадот.
„Секоја вечер е исто. Контејнерите се празнат нередовно, а ние живееме во оваа срамна глетка,“ велат жители за локалните медиуми.
Градоначалникот на Центар, Горан Герасимовски, изминатата ноќ лично учествувал со општинските хигиеничари во расчистување на натрупаното ѓубре, обвинувајќи го Јавното претпријатие „Комунална хигиена“ и Градот Скопје дека не си ја извршуваат работата. „И по мојот апел, повторно ќе слушнеме демант дека навремено го собираат сметот,“ рече тој во видеообраќање.
Во Куманово, реката Кумановка е претворена во дивa депонија, предупредуваат локалните еколошки организации.
Градоначалникот на Карпош, Стевчо Јакимовски, оцени дека неговата општина е „саботирана“ преку намерно несобирање на отпадот и го повика премиерот Христијан Мицкоски да реагира. „Карпошани не заслужуваат да им смрди отпад под носот,“ изјави тој.
Собирањето на отпадот во главниот град е хроничен проблем кој повторно излезе во преден план во пресрет на локалните избори закажани за 19 октомври.