Саранда Имери Стафаи, пратеничка на коалицијата ВЛЕН, го обвини Али Ахмети и неговата Демократска унија за интеграција (ДУИ) дека го „продале патриотизмот за пари“, откако семејството на Ахмети на 17 септември 2025 година ги продало своите акции во Алта Банка од Белград, институција поврзана со режимот на српскиот претседател Александар Вучиќ.
Имери Стафаи обвини дека зад патриотската реторика на ДУИ се кријат корупција, перење пари и врски со Белград, повикувајќи ги Албанците „да ја знаат вистината“ и да престанат да живеат во „лажги“.
И еден од лидерите на ВЛЕН, Билал Касами, обвини во саботата дека блискиот круг на лидерот на ДУИ, Али Ахмети, остварил финансиски договори со српска банка поврзана со претседателот на Србија, Александар Вучиќ.
Касами во објава на Фејсбук наведе дека прикажал докази оти таткото на сопругата на синот на Ахмети продал илјадници акции од неговата компанија „АС Сенјак“ на српската Алта банка.
„Додека јавно зборуваа за патриотизам и нѐ обвинуваа нас, тајно правеле зделки со Србите и ја отворале вратата за Белград,“ напиша Касами.
Тој додаде дека е време да се „разоткрие оваа хипокризија и манипулација“ и дека со факти ќе ги докаже врските на ДУИ со концептот „Српски свет“.
„Политиката мора да има црвени линии што не смеат да се преминат по никаква цена,“ истакна Касами.
Продажбата на акциите во Алта Банка, банка со седиште во Белград која во јавноста се поврзува со бизнис-кругови блиски до српскиот претседател Вучиќ, предизвика реакции во албанскиот политички блок.
Банката, која е основана во 1979 година како Jubmes banka, во 2020 година го смени името во Алта Банка по целосното преземање од страна на Alta Pay Group, компанија во сопственост на српскиот бизнисмен Давор Мацура.
Со вкупна актива од над 121 милијарди динари и добивка од околу 1,6 милијарди динари во 2024 година, Алта Банка е рангирана како 12-та по големина банка во Србија, со пазарен удел од речиси 2%. Банката рапидно го проширува своето присуство, вклучително и преку договори за плаќање на јавни услуги, како фактури за електрична енергија и паркинг, што предизвика коментари дека ужива поддршка од државата.
Експанзијата на Алта Банка излезе и надвор од српскиот пазар. Во тек е процес за преземање на Стопанска банка Битола во Северна Македонија, за што компанијата понуди околу 23 милиони евра. Комисијата за хартии од вредност ја одобри постапката, но таа беше прекината во август годинава поради промени во структурата на аквизиторот.
Критичарите предупредуваат дека Алта Банка е блиска до власта на српскиот претседател Вучиќ и дека нејзиното ширење може да има и геополитички димензии, покрај економските интереси. Поддржувачите, пак, велат дека станува збор за модерна институција што го зајакнува финансискиот пазар и ја зголемува конкуренцијата.