Владите на земјите членки на Европската Унија очекуваат предлогот за следниот седумгодишен буџет на блокот да биде намален за меѓу 100 и 200 милијарди евра во однос на претходниот план од речиси два трилиони евра, објави „Политико“, повикувајќи се на 12 европски дипломати.
Ирска, која претседава со Советот на ЕУ и ги води преговорите, треба во сабота да претстави нов предлог, пред самитот на лидерите на Унијата следната недела.
Главната поделба е меѓу т.н. штедливи земји, меѓу кои Германија, Австрија и Холандија, кои бараат значително намалување на трошоците, и групата „Пријатели на кохезијата“, во која се Италија, Шпанија, Полска и други земји што се против големи кратења.
Земјоделството и кохезијата би биле поштедени
Според дипломатите, ирскиот предлог би можел да предвиди кратење од 100 до 200 милијарди евра, но со обид да се заштитат средствата за земјоделството и регионалната политика.
Со тоа Даблин би се обидел да најде компромис меѓу земјите што бараат штедење и оние што инсистираат на зачувување на традиционалните европски фондови.
Поголемите намалувања, според „Политико“, би можеле да ги погодат фондот „Глобална Европа“, вреден околу 200 милијарди евра, како и Европскиот фонд за конкурентност, за кој се планирани околу 410 милијарди евра.
На маса се и кратења на административните трошоци на институциите на ЕУ, за кои се предвидени околу 118 милијарди евра.
Германија бара повеќе пари за одбрана и конкурентност
Штедливите земји се против идејата земјоделството и кохезијата целосно да бидат заштитени од кратењата.
Нивниот став е дека поголем дел од средствата треба да се пренасочат кон новите приоритети на Унијата, пред сè одбраната, конкурентноста и индустриската политика.
Во исто време, 17 земји минатата недела објавија заедничка позиција против намалување на средствата за земјоделство и регионален развој.
Спор и околу новите европски даноци
Дополнителен спор во преговорите е воведувањето нови сопствени приходи на ЕУ.
Европската комисија во 2025 година предложи пет нови давачки што би требало да носат околу 66 милијарди евра годишно.
Неколку земји бараат да се укине предложениот корпоративен данок познат како CORE, но според „Политико“, Ирска најверојатно ќе го задржи во преговарачкиот документ, со можност малите и средните претпријатија да бидат изземени.
Предлозите на Европскиот парламент за даноци на дигитални услуги, онлајн коцкање и криптокомпании, пак, најверојатно нема да бидат вклучени.
Европските влади се обидуваат да постигнат договор пред изборите во Франција, Полска и Италија во 2027 година, кои би можеле дополнително да ги усложнат преговорите.