Европските туристи кои планирале летни одмори во источниот Медитеран сè почесто ги менуваат своите дестинации и се насочуваат кон западниот Медитеран и Карибите поради војната меѓу САД и Израел со Иран, соопштија туристички компании.
Патниците од Велика Британија и од континентална Европа се откажуваат од планираните патувања во Кипар, Турција и Грција и наместо тоа избираат дестинации како Италија, Шпанија, Малта и Хрватска, додека конфликтот на Блискиот Исток предизвикува откажувања на летови и затворање на воздушниот простор во регионот.
Туристичките агенции велат дека несигурноста околу безбедноста и потенцијалните нарушувања во авиосообраќајот ги тера туристите да избираат „попознати и полесно достапни“ дестинации за летниот одмор.
Индустријата за патувања предупредува дека конфликтот веќе има економски последици за туристичкиот сектор во источниот Медитеран, кој во голема мера зависи од посетители од Европа.
Туристичките оператори додаваат дека трендот на пренасочување на резервациите може да продолжи доколку безбедносната ситуација во регионот остане неизвесна во пресрет на главната летна туристичка сезона.