Северна Македонија дала согласност бугарски медицински специјалисти да учествуваат во проценката на здравствената состојба на Ива Михајлова, бугарска и македонска државјанка обвинета во постапка за сообраќајна несреќа со смртен исход, соопшти во бугарскиот парламент пратеникот Иван Голомеев од „Прогресивна Бугарија“, пренесуваат бугарски медиуми.
Според Голомеев, согласноста била дадена со официјална нота од 5 октомври, а информацијата била потврдена од бугарската амбасада ден подоцна.
Следниот чекор е да бидат определени бугарските лекари и да се организира заеднички медицински преглед.
„Прогресивна Бугарија“ го поздрави потегот на македонските власти и побара прегледот да биде организиран без одлагање.
Партијата бара, доколку лекарите проценат дека е неопходно лекување надвор од Северна Македонија, да се разгледа можноста за промена на ограничувањата за патување со соодветни гаранции дека Михајлова ќе продолжи да учествува во судската постапка.
Обвинета за сообраќајна несреќа со жртва
Постапката против Михајлова се однесува на сообраќајна несреќа од почетокот на октомври 2025 година во која едно лице загинало, а повеќе лица, меѓу кои и таа, биле повредени.
Михајлова е обвинета за кривично дело поврзано со безбедноста на сообраќајот.
Нејзината одбрана тврди дека другиот автомобил навлегол во нејзината коловозна лента.
Тоа е позиција на одбраната, а конечните факти треба да ги утврди судот.
По несреќата на Михајлова ѝ биле одземени патните документи како дел од мерките во судската постапка.
Бугарската страна тврди дека поради повредите на ‘рбетот ѝ е потребен третман што може да се обезбеди и во Бугарија.
Сега, со дозволувањето бугарски медицински специјалисти да учествуваат во проценката, треба да се утврди каков третман ѝ е неопходен и дали евентуално би било потребно лекување надвор од земјата.
Случајот стигна и до меѓународни институции
Бугарски претставници претходно го покренаа случајот пред Советот на Европа и Обединетите нации.
Според Голомеев, на 16 септември бугарската претседателка Илијана Јотова го отворила прашањето пред генералниот секретар на Советот на Европа Ален Берсе, а на 22 септември во Њујорк го поставила и пред високиот комесар на ОН за човекови права Фолкер Турк.
„Прогресивна Бугарија“ најави дека ќе бара случајот да продолжи да се следи и во европските институции.