ВМРО-ДПМНЕ ја осуди дистрибуцијата на фотомонтажи и лажни обвинувања поврзани со трагичните настани во Кочани, истакнувајќи дека станува збор за „срамна, злонамерна и монструозна“ кампања со цел политичка манипулација.
Според партијата, содржините биле објавени на новооснованата интернет страница ubijcitenakocani.com, чиј домен бил регистриран на 16 септември 2025 година. Од ВМРО-ДПМНЕ посочуваат дека јавното отсуство на податоци за регистрантот, во комбинација со анонимни name servers, укажува на намерна прикривка на вистинските сопственици.
„За ВМРО-ДПМНЕ е јасно дека зад ваквите обиди стојат структури блиски до министерот Венко Филипче, кои злоупотребуваат политика и јавен простор за лични и партиски цели“, се наведува во соопштението. Партијата повикува на итна реакција од надлежните институции и истрага за утврдување на вистинските иницијатори на кампањата.
ВМРО-ДПМНЕ ја нагласува важноста трагедијата да остане недопирлива и вели дека политичката омраза и лажните обвинувања не смее да се користат како инструмент за политичка борба. „Обидот да се оцрни политички противник преку монструозни конструкции не е ништо друго освен признание за немоќ и недостаток на идеи“, стои во соопштението.
Партијата потсетува дека останува посветена на демократијата, дијалогот и решавањето на проблемите на граѓаните преку одговорни политики, а не преку ширење омраза и дезинформации.
Социјалдемократскиот сојуз на Македонија (СДСМ), пај, најави дека ќе поднесе кривична пријава за откривање на сторителите зад, како што велат, морбидната кампања на ВМРО-ДПМНЕ на интернет, со која опозициската партија се обидува да се претстави како жртва во јавноста.
СДСМ посочува на фотомонтажа објавена на веб-страницата www.ubijcitenakocani.com, каде наводно испрскан со крв е прикажан премиерот Христијан Мицкоски, министерот за внатрешни работи Панче Тошковски и директорот на Бирото за јавна безбедност Александар Јанев.
„Ваквиот обид ја открива слабоста на оваа власт, која нема проекти ниту политики. Најновата измислица на Мицкоски и ВМРО-ДПМНЕ денес е тврдењето дека некој барал ‘убиство на Мицкоски’. Веб-страницата е регистрирана на 16 септември 2025 и наполнета со содржина непосредно пред прес-конференцијата на партискиот портпарол, што укажува дека е направена за морбидни пиар-потреби“, соопшти СДСМ.
Партијата побара ВМРО-ДПМНЕ да се извини за обидот за манипулација и предупреди дека во спротивно ќе поднесе тужба за клевета. Дополнително, СДСМ побара од институциите да ја испитаат сопственоста на спорната веб-страница.
ВМРО-ДПМНЕ, пак, оцени дека кривичната пријава е обид на СДСМ да ја дефокусира јавноста и да се огради од, како што велат, повиците за убиство против премиерот, министерот и директорот на БЈБ. „Кривичната пријава е како убиец да ја обвини жртвата дека сама го организирала злосторството“, велат од партијата.