Уставниот суд во средата одлучи да не поведе постапка за правилникот на Државната изборна комисија (ДИК) со кој се уредува постапката за собирање потписи за кандидатските листи. Со тоа останува на сила можноста независни кандидати да учествуваат на избори со два потписи, пренесоа судските извори.
Претседателот на Судот изјави дека правилникот не е во спротивност со Изборниот законик и дека одлуката на ДИК е во согласност со претходната пракса. „Би било сериозно кршење на Уставот ако независните граѓани немаа право да учествуваат во изборниот процес“, рече тој.
Судијата Костадиновски додаде дека одлуката на ДИК „не претставува ограничување, туку имплементација на одлуката на Уставниот суд“.
Со ова, кандидатурите поднесени од група избирачи ќе можат да се валидираат со два потписи заверени кај нотар, како што беше пропишано со правилникот на ДИК.