Канада, Австралија и Велика Британија во неделата објавија дека ја признаваат независната држава Палестина, потег што ги става во директен судир со САД и ја продлабочува изолацијата на Израел во меѓународната заедница.
Трите земји – сојузници на Израел со децении – наведоа дека нивната одлука е мотивирана од разочарувањето поради застојот во мировниот процес и отсуството на изгледи за решение со две држави.
Британскиот премиер Кир Стармер изјави дека признавањето е „обид да се одржи живо светлото на мирот“ и нагласи дека „Хамас нема иднина во Палестина“. Тој најави дополнителни санкции кон раководството на Хамас во наредните недели.
Канадскиот премиер Марк Карни рече дека шансите за договорено решение „се сериозно еродирани“ поради „перманентната закана од Хамас, забрзаното проширување на израелските населби на Западниот Брег и хуманитарната катастрофа во Газа“. Тој истакна дека Канада ќе го поддржи Палестинскиот авторитет, но дека Хамас мора целосно да се разоружа и да не игра улога во идното управување.
Австралискиот премиер Ентони Албаниз и шефицата на дипломатијата Пени Вонг во заедничко соопштение рекоа дека признавањето ја одразува „долгогодишната заложба на Австралија за решение со две држави, што е патот кон траен мир и безбедност“.
Израел со остри осуди
Израелскиот премиер Бенјамин Нетанјаху остро ја осуди одлуката, велејќи дека „нема да има палестинска држава“. „Тие што ја признаваат Палестина, веднаш по масакрот на 7 октомври, му даваат огромна награда на тероризмот“, рече тој.
Министерот за надворешни работи Гидеон Саар го нарече потегот „разгорувачки и неморален“, а спикерот на Кнесетот Амир Охана го обвини Стармер дека е „модерен умирител кој избра срам“. Крајно десничарскиот министер за национална безбедност Итамар Бен Гвир оцени дека признавањето е „награда за убиеците“ и повика на веднаш проширување на израелскиот суверенитет врз Западниот Брег.
Палестински реакции
Претседателот на Палестинската управа Махмуд Абас ја поздрави одлуката на Британија, велејќи дека таа е „важен и неопходен чекор кон праведен и траен мир“. Тој повтори дека приоритет останува прекин на огнот во Газа, влез на хуманитарна помош и целосно повлекување на Израел.
Висок функционер на Хамас, Басем Наим, ја нарече одлуката „позитивен чекор“ но нагласи дека таа мора да биде проследена со конкретни мерки на терен за да се спречи, како што рече, „ционистичкиот план да се оспори било каква палестинска политичка иднина“.
Франција најави дека ќе ја признае палестинската држава за време на Генералното собрание на ОН следната недела, додека Германија и Италија порачаа дека немаат намера да го сторат тоа во догледно време.
Со денешната одлука, Велика Британија, Канада и Австралија се приклучуваат на повеќе од 140 земји кои досега ја признале Палестина како држава. Потегот доаѓа во момент на засилени борби во Газа, каде што, според палестинското Министерство за здравство, повеќе од 65.000 луѓе се убиени од октомври 2023 година.